«Қазақстан үшін зейнетақы жүйесінің әртараптандырылған моделін сақтап қалу маңызды, себебі зейнетақы төлемдері көздерін әртараптандыру қағидаты Қазақстанның зейнетақы жүйесіне қаржылық тұрғыдан орнықты болып қалуына мүмкіндік береді». Осындай пікірді Бірыңғай жинақтаушы зейнетақы қоры жанындағы Қоғамдық кеңестің кезекті отырысында  «Зейнетақы секторындағы ағымдағы ахуал және зейнетақы активтерін басқару туралы» таныстырылымымен сөз сөйлеген кезде  Қазақстан Ұлттық Банкі Төрағасының орынбасары Дина Ғалиева білдірді.

Д. Ғалиеваның айтуы бойынша, көптеген елдер зейнетақыларды әртүрлі құрауыштардан төлеуді көздейтін зейнетақы жүйесінің әртараптандырылған моделін құру жолымен жүрді. «Бұл модель бір құрауыштың кемшіліктерін басқасының артықшылықтары есебінен өтеуге мүмкіндік береді», – деді ол.  

Сөзін жалғастыра отырып, Д. Ғалиева «халықаралық стандарттарда зейнеткерлерге жұмыс өтілі кемінде 35 жыл болған және аударымдар жүйелі түрде жылына 12 рет жасалған кезде жоғалтқан жалақысының кемінде 40%-ы деңгейінде алмастыру коэффициентімен қамтамасыз ету қажеттілігі ұсынылатынын» атап өтті. «Қазақстанда осы стандарттарға сәйкестік ортақ және базалық зейнетақыларды, БЖЗҚ-дан төленетін төлемді, 2023 жылдан бастап шартты-жинақтау құрауышынан төленетін төлемді және 2030 жылдан бастап бюджеттен кепілдік берілген ең төмен зейнетақыны қоса алғанда, әртүрлі құрауыштардан төленетін төлемдер есебінен қамтамасыз етіледі», деп түсіндірді Д. Ғалиева.

Сонымен бірге, сөз сөйлеу барысында Қазақстан Ұлттық Банкі Төрағасының орынбасары «Ұлттық Банктің жұртшылық пен Ұлттық Банктің арасындағы зейнетақы жүйесін дамытуға және жетілдіруге бағытталған ашық диалогтың нысаны ретінде БЖЗҚ жанындағы Қоғамдық кеңестің жұмысына үлкен мән беретініне» назар аударды.