2017 жылғы 12 шілдеде ҚРҰБ Төрағасы Д. Ақышев бастаған ҚР Ұлттық Банкінің делегациясы Еуразиялық экономикалық одақ ұлттық (орталық) банктерінің валюталық саясат жөніндегі консультативтік кеңесінің Санкт-Петербург қаласында өткен 14-ші отырысына қатысты.

Отырыс барысында Армения Республикасы, Беларусь Республикасы, Қазақстан Республикасы, Қырғыз Республикасы және Ресей Федерациясы орталық (ұлттық) банктерінің төрағалары ағымдағы экономикалық ахуал, валюталық бағам саясатын қоса алғанда, ақша-кредит саясатын іске асыру туралы ақпарат алмасты.

Тараптар ортақ қаржы нарығын құру шеңберінде Еуразиялық экономикалық одаққа қатысушы мемлекеттердің ұлттық заңнамаларын үйлестірумен, сондай-ақ тұтынушылардың, бизнес-құрылымдардың және қаржы институттарының мүддесін ескере отырып қаржы нарықтарын ықпалдастырудың тәсілдерін әзірлеумен байланысты мәселелерді талқылады.      

Валюталық саясат жөніндегі консультативтік кеңес Еуразиялық экономикалық одаққа мүше мемлекеттердің орталық (ұлттық) банктерінің консультативтік-кеңесші органы болып табылады, оның негізгі мақсаты валюталық саясатты үйлестіру, оның ішінде өзара есеп айырысу кезінде ұлттық валюталарды кеңінен пайдалануды қамтамасыз етудің бірыңғай тәсілдері мен бағыттарын әзірлеу болып табылады.