Ұлттық Банк экономиканың ұзақмерзімді орнықты өсуін қамтамасыз ету мақсатында ақша-кредит саясатына сәйкес шаралар қабылдауды жалғастырады және қаржылық тұрақтылықты қамтамасыз ету бойынша жұмысты жалғастырады. Қазақстан Ұлттық Банкінің Төрағасы Данияр Ақышев баспасөз конференциясы барысында журналистермен осындай жоспарларымен бөлісті.

«Банк секторының жиынтық активтері 2017 жылғы 1 ақпанда 25,2 трлн. теңгені немесе ІЖӨ-нің 55,2%-ын, несие портфелі – 15,3 трлн. теңгені немесе ІЖӨ-нің 33,5%-ын құрады», – деп хабарлады Д. Ақышев.

Сондай-ақ ҚР ҰБ басшысы салымшылардың зейнетақы жинақтарына байланысты деректерді де атап өтті. Мәселен, «зейнетақы жинақтары 1 ақпандағы жағдай бойынша 2017 жылдың басынан бастап 28,5 млрд. теңгеге (0,4%) ұлғайып, 6,7 трлн. теңгені немесе ІЖӨ-нің 14,7%-ын құрады».

Д. Ақышевтың айтуынша, сақтандыру секторында оң серпін байқалады. «Сақтандыру (қайта сақтандыру) ұйымдары активтерінің жиынтық көлемі 1 ақпанға жыл басынан 2%-ға өсумен 873,9 млрд. теңгені құрады. Сақтандыру (қайта сақтандыру) ұйымдарының міндеттемелері жыл басынан 474,2 млрд. теңгеге дейін 4,4%-ға өсті», – деп қорытындылады Қаржы реттеушісінің басшысы.