Банктердің экономикаға кредиттерінің көлемі 2016 жылы 12,9 трлн. теңгеге дейін 1,5%-ға ұлғайды. Бұл туралы ҚР Ұлттық Банкінің Төрағасы Данияр Ақышев ҚР Парламенті Мәжілісінде баяндама жасаған кезде хабарлады.

Бұл ретте, оның айтуы бойынша кредиттеуде айтарлықтай құрылымдық өзгерістер болды. Мәселен, шағын бизнесті кредиттеу 1 трлн. теңгеден аса ұлғайды. «Олардың кредиттік портфельдегі үлесінің өсуі ең жоғары 24% мәніне жетті. Яғни, банктер әрбір 4-ші теңгені шағын кәсіпкерлікке берді», – деп нақтылады ол.  

Сондай-ақ, Ұлттық Банк басшысы өңдеу өнеркәсібінде, ауылшаруашылығында, саудада кредиттеу жандандырылғанын атап өтті. «Енді біздің міндетіміз жалпы экономика бойынша кредиттеудің өсуінің сенімді траекториясы болып табылады, – деп мәлімдеді Д. Ақышев, – Банк секторының кредиттік белсенділігін қалпына келтіру үшін көбірек уақыт қажет. Елдің қаржы секторын «қайта жаңғырту» қажет. Бұл бағыттарды Мемлекет басшысы Жолдауында айқындады. Біз тиісті жұмысты бастадық».