2018 жылғы 16 қарашада «Атамекен» ҰКП алаңында өзара трансшекаралық есеп айырысуда Қазақстан Республикасының және Қытай Халық Республикасының ұлттық валюталарын пайдалану мүмкіндігін талқылауға арналған дөңгелек үстел өтті.

Дөңгелек үстелдің отырысына Алматы облыстық филиалдың директоры Е. Жұмабеков, ҚР Ұлттық Банкі орталық аппаратының өкілдері, Қытай Халық Банкінің Синьцзян бөлімшесінің Президенті Г. Цзяньвэй, Алматы облысының Кәсіпкерлер палатасының директоры Н. Абильшаиков, Алматы облысының Кәсіпкерлер палатасы директорының экономикалық мәселелер жөніндегі орынбасары А. Шаяхметов, «Қорғас» ХШЫО АҚ Президенті К. Джазин, «Қорғас» ХШЫО АҚ ЕЭА кәсіпкерлер қауымдастығының Төрағасы Г. Сакиева қатысты. Іс-шараға қызметін Алматы облысында және «Қорғас» ХШЫО АҚ аумағында жүзеге асыратын екінші деңгейдегі банктер филиалдарының және трансшекаралық кәсіпорындардың өкілдері де шақырылды.

Іс-шараның барысында екі мемлекеттің валюталық қатынастарының ағымдағы аспектілері талқыланды, сауда және инвестициялық қызметтің шегінде трансшекаралық есеп айырысуда ұлттық валюталарды пайдаланудың перспективалары мен артықшылықтары талқыланды, Қазақстан мен Қытайдың қаржы нарықтарының инфрақұрылымын дамыту мәселелері қозғалды. Дөңгелек үстелдің барысында ҚР мен ҚХР банктік және клирингтік ұйымдарының қатысуымен ұлттық валютада төлемдер мен клирингті жүзеге асыру тәсілдері мен тәртібі қаралды, сондай-ақ Қазақстанның теңгесінде және Қытайдың юанінде өтімділік көздерінің болуы аталды.